我老豆又出軌
今次我又係點發現呢？
琴日同老豆北上食嘢，嗰度要掃 QR code 落單，我就用佢部手機落。
點知，就喺我掃緊嗰陣，突然有個 WhatsApp 彈出嚟：
「老公😘掛掛❤️❤️❤️」
我當場火遮眼。
忍咗咁耐，今次終於爆發。
我喺餐廳大大聲鬧老豆：「你個小三又搵你呀？你唔撚係呀？有冇搞錯呀？明知道你同個女食飯，佢都仲要搵你？係咪當我冇到呀？可唔可以尊重下我少少？我知道你哋平時有偷偷 WhatsApp，我都扮睇唔到，今次仲要我兜口兜面見到？過唔過份啲呀你？其實你哋想我有咩反應呀？唔該你，要偷食都偷食得聰明啲啦！」
我將由細到大對佢偷食嘅怒氣，一次過爆哂出嚟。點知，佢越解釋越過份。當日出現咗好多渣男金句。
第一金句一出，我真係笑唔出：
「哎呀～我都叫咗個女人唔好再 send 埋啲說話比我㗎啦～」
聽到呢句，我心諗：
「哦，即係問題唔係你偷食，係佢 send 得太肉麻啫？」
「你咁驚人睇到，咁不如一早唔好撚搞啦？」
跟住佢仲要補多刀：
「我同佢都係吹吓水啫，冇你諗得咁誇張。」
我即刻反問：
「吹水要吹到叫『老公😘掛掛❤️❤️』咁親密㗎？
你同你男同事都咁吹法呀？定係而家出軌都可以叫做『吹吓水』？」
佢見兜唔到，又索性扮委屈：
「你細個開始都成日串我、鬧我，同你相處壓力好大，我咪想搵人傾吓囉。」
呢句簡直第二金句，我心諗你噏乜鳩，將偷食合理化變成「被迫」出去搵安慰，好似全世界虧欠佢咁。
嗰一刻，我好清晰：
佢唔係唔知錯，佢只係覺得，比人捉到都可以靠幾句對白過骨。
